Un repiqui de campanas
comu el día de San Roqui;
y en el salón y en la plaza
estará el baili de nochi
pa to´l que quiera il,
que´l vinu que s´a comprau
se tieni que consumil.

El alcaldi echará un bandu
pa tos los vecinus,
una semana de fiestas
que hay que terminal el vinu.

De los pueblus forasterus
los jombris pol los caminos
vienin derechus a la plaza
andi repartin el vinu.

Las mocitas forasteras
que vienin a la función
comu no les gusta el vinu
van derechas al salón.

Las mozas vistin de gala,
las mujeris con mantonis,
los mozus van pol las callis,
van tocandu acordeonis
y tocandu la guitarra,
y los viejus en la plaza
ca unu con su jarra.

Ellus bebin cuandu quierin
y cuandu acaban el vinu
los asistin las mujeris.

La juventú va mirandu
cómu bailan los ancianus;
con el pelinu peinau
y el cigarrinu en la boca
que paecin Sevillanus.

Los forasterus gritandu:
¡viva Dios, viva la presa,
pol toa la eterniá,
pa que tengan estus pueblus
la cosecha asegurá!

Pa cogel muchu maíz,
muchu algodón y tabacu,
pa que jumin los jombris
y den algu a los muchachus.

Y las mujeris que jumin
que llenin las faltriqueras
y que se sientin al sol,
y ellas jumin cuandu quieran.

Si alguna no tieni lumbri
y pasa algún forasteru:
¡güen amigu pol favol,
venga a encendelmi el mecheru!