Escucharun los discursus
tos con mucha atención
y al terminal los discursus
juerun a su obligación.

Juerun a semblal el árbul
que tenían que semblal
y dispués que le semblarun
a la era´l tíu Marcial
a disfrutal del banqueti
que les tenían prometiu,
peru al llegal a la era
el banqueti destruiu.

Cayó una bandá de "langostas"
y otra bandá de "pulgón";
si los niñus tardan algu
ningunu prueba el jamón.

El vinu no lo probarun,
el chorizu no lu vierun
¡cómu pondría la barriga
el bandu que jué primeru!

¡Esu no debi de jadelsi!
¡A los niñus no s´engaña!
Pa reílsi d´ellus
iban tirandu castañas.

Tos caían rodandu,
Se levantan, paecin moscas,
al desleílsi el jamón
que se comió la "langosta".

¡Qué prontu se l´olvió
lo que jidía el señol cura:
que según vean los ejemplus
aprenderán las criaturas!

Los niñus güelvin al pueblu,
regresu de la función,
y jidin que riegui el árbul
el que se comió el jamón.

Peru comu son pequeñus
y no son personas cultas
jidin: reguemus el árbul
que´l árbul no tieni culpa.

Si llegamus a otru añu,
to´l que puéa llegal,
no comeremus jamón
en la era´l tíu Marcial.

Lo comeremus en casa
con las ventanas cerrás,
pa que no entri la "langosta",
que si entra no quéa ná.