LO QUE NOS TRAERÁ EL FUTURO
 
Cuandu termini la obra
proyectá en el "Cabril"
en el pueblu Valdeobispu
¡que a gustu se va a vivil!

¡Fábricas de toas clasis!
¡La gran fábrica de luz!
Y aquel que nunca esté enfermu
gozará de güena salú.

El pueblu se extendirá
comu se extiendi la yedra;
en el pueblu Valdeobispu
nunca tendremus miseria.

Aumentará el vecindariu,
vendrán muchus forasterus,
en el pueblu Valdeobispu
correrá siempri el dineru.

En jiciendo la canal
que pasi pol Las Alturas,
viendu esus campus regaus
esu será una hermosura.

Las güertas verdigueandu
sin somblas de las encinas;
los mozus serán mu guapus
y gastarán gabardinas.
Los domingus se reúnin
y juntus se van a misa.

Las mozas en el veranu
irán muchas a regal;
y pol la tardi se bañan
pos se quierin reflescal.

Trabajarán en lo suyu,
trabajarán con anhelu
pa compralsi un vestiu.
Vestirán honestamenti
y gastarán medias finas,
y los domingus al baili
con los de las gabardinas.

Obrerus de Valdeobispu
meterus tos a jortelanus
pos el que quiera sel ricu
tieni el remediu en la mano.

En terminandu las obras
corri el agua pol la presa,
lo primeru que se riegue
será "Malpelo" y la "Jesa".

Arministral bien las güertas
y dal´las güenas sazonis;
cuandu vengan las cosechas,
los billetis a montonis.

Y guardandu algún billeti
aunqui se pongan añejus
será güestra salvación
el día que lleguéis a viejus.