LA JUVENTUD DE AQUELLOS DÍAS FELICES
 
Cuandu se riegui "Malpelu"
con las aguas del "Cabril",
las mozas de Valdeobispu
ya no irán a "Sartaleju"
ni tampocu a la "Marquesa",
polque tendrán toas güertas
en "Malpelu" y en la "Jesa".

Se levantarán templanu
pa il a regal sus güertas;
cuandu salgan a la calli
ya las esperan en la puerta.

¡Güenus días rosa encarná!
¡Adiós capullitu míu!
¡Que mañana más templá!
¡No jaci una chispa fríu!

¡Ay, que día tan hermosu!
Lo vamus a´provechal,
pos yo me voy a "Malpelu"
que tengu que il a regal.

Yo tamién voy a "Malpelu"
que tengu que il a regal
y si acabu templanitu
dispués te voy a´speral.

Los mozus se van templanu,
las mozas tardi detrás,
cuandu entran en "Malpelu"
las mozas toas van cantandu
y en los altus y en los bajus
las mozas se ven regandu.

¡Vamus allá clavellina,
vamus tos a regal,
cuandu toqui la campana
nos vamus a merendal!

S´aproxima´l mediudía,
s´empiezan a rejuntal,
cuandu van pol el caminu
van cantandu esti cantal:
"No hay alegría en el mundu
comu venil a las güertas
y vamus a merendal
con nuestrus mozus a cuesta."

Llegan a casa, meriendan,
s´empiezan a preparal;
y pol la tardi al Rosariu,
dispués al baili a bailal.

Jidin esus grandis sabius
que´l baili es una locura,
y yo les digu a esus sabius
que´s la dulci calentura.

Van entrandu las parejas
y s´agarran a bailal,
y no pasan diez minutus
y s´empiezan a sental.

Jidi un sabiu: esu es cansanciu,
una miaja de calol.
Y yo le digu a esi sabiu
que´s otra cosa peol.

To aquel que se marei,
y no tenga quien l´ampari,
que se salga del salón
y se pasei pol la calli.

Y si jaci güena luna
que se vaya al Egiu
y se meta en la laguna;
moji bien el camisón
y no le retuerza el agua
y güelva dispués al salón;
y que se agarri a bailal,
que aunqui baili un pal de horas
no se güelvi a mareal.