En
el corral de tíu Siru
s´han encontrau´n sombreru
y se l´a puestu tíu Luciu,
que paeci un aceiteru.
María
me lo robó
y comu vió que´ra güenu
se l´a llevau a Plasencia
pa ponélsilu al Morenu;
Y
hubu genti que le jidu:
no te vayan a pillal;
y lo cogió pol la nochi
y lo tiró en el corral.
Y l´an teníu enterrau
entri la paja y el polvu
to s´ha puestu manchau.
María,
nos dejemus ya de líus
y de tanta zaragata;
tu te quieris casal conmigu,
me l´han dichu las muchachas
y tamién el Morenitu.
El
día que nos casemus
nos comemus un cabritu
y dispués vendu la piel
al que de más dineritu.
Y
te compru unus zapatus
aunqui sean de charol,
pa que luegu me paezcas
una jardinera en flol.
Esti
añu, si Dios quieri,
y pinta la montanera
a vel si poemos matal
la guarrapina lechera.
De
las tuyas Mariquina
polque la mía se murió;
no hay más que tenel paciencia
que to lo manda Dios.
Si
güelvi a paril la cabra
y nos pariera un chivín,
el día que lo comamus
te preparu un chiquinín.
Luegu
te vas a crial´lo
a Plasencia o a Madrid
andi ganis muchus durus,
qu´aunqui el añu venga malu
yo el pan lo tenga seguru.
Me
mandas a mí el dineru
aunqui sea pol aeroplanu,
a vel si poemus compral
la casilla de Poncianu.
Una
vez que la compremus
y la junti con la mía,
si tu no quieris volvel
la casilla será mía.
Yo
me quearé aquí en casa
pa cuidal los muchachus,
y pa adivinal su sinu;
Santiaga está toa revuelta
con unu de Silvestrinu.
Yo
m´ansomaré al balcón
y hablaré con los vecinus,
a vel si pueu averigual
qué jadi la "Moreguina".
Según
la pinta que tieni
(ella no lo pué negal)
el día menus pensau
tamién se marcha a crial.
Yo
lo que quieru es, María,
que traigas muchu dineru,
pa poel´lo disfrutal
nos vamus al extranjeru.
Aviamus
las alforjas
y los cuernus con aceiti;
nos vamus a veraneal
a la calleja la juenti.
Allí
tenemus güena sombla
que no nus penetra el sol,
y pol la nochi nus vamus
a jadel la cama al "Pintol".
Allí
vemus nuestras parrinas
y vemus nuestrus olivus,
pol la mañana templanu
Yo daré güelta a la viña
pol si veu algún coneju
y si lo puéu apañal
nos lo llevamus pa casa
y tenemus pa cenal.
Avisas
a las muchachas:
¡muchachas vamus a casa!
Que tíu ha cogíu un coneju,
no creáis qu´a sío chico,
qu´a síu un coneju vieju. |