TESTAMENTO DE TIA LORENZA "LA PINCHA"
 
 
Yo, Lorenza Alcón y Torris.
jagu examin de conciencia
pa dejal a mi familia
esta pequeñísima herencia.

Los primerus que encabezan
son los hijus de Vicenti,
pa cuando se juntin tos,
pa que se enseñin los dientis.

Cuandu coja Isác la carta
de su esposa Vitorina,
lo reucirá a dineru
y comprará unas gallinas;
y se va pa "Peña´l Rey",
que´l güertu de 'Matarrosu"
tamién desd´allí lo veis.

A Antoniu Güetu le deja
a la su puerta sentau,
pa si su madri se mueri
no quei desamparau.

A Sebastiana la jidi
que no tenga más familia,
que no volverá ningunu
a sentalsi en la casilla.

Gavina no lleva herencia
peru lleva un güen destinu:
si quieri ganal dineru
que atici con agua´l vinu.

El que mejol parti lleva,
es Rogeliu el de la plaza;
pa´l día que esté lloviendu
que no se salga de casa.

Esi lleva güena parti,
bien se pué comprendel,
y las ventajas que lleva
es que no aprendió a leel.

A la Wenceslá la deja
la calleja del Pocillu,
pa que le enseñi tíu Fraili
lo largu que´s el bolsillu.

A Franciscu el de la Petra
l´a dejau una Libreta;
pa que le sirvan las hojas
de tacos pa la´scopeta.

Un testamentu bien jechu,
un testamentu legal;
tíu Fraili el testamentariu
pol si algu saliera mal...