Se ve la sierra Dios Padri;
la sierra de Candelariu
y de Cabezabellosa
(pueblu de muchus cabrerus)
andi nacin güenas mozas.

Si miras pal mediudía
tamién se ve Miravel,
y bien cerca en la´stación
se ven los trenis correl.

Si miras pa la derecha,
verás inmensas llanuras
andi a los montis d´encinas
los jan jechu sepultura.

Árbulis de muchus siglus
los arrancarun de cuaju
pol la juerza irresistibli
d´unus grandis maquinarius.

La tierra los ja criau
pa dal cebu a los cerdus
y rama pal ganau;
árbulis con mucha vida
y pol esta civilización
los cortarun de raíz
pa jadel de ellus carbón.

¡El mundu va progresandu,
el mundu va dandu güeltas,
nos van queandu sin montis
pa convertil´lus en güertas!

Tamién se divisa un pueblu
que´s El Rincón del Caudillu
andi vendrán las familias
(rodeás pol las aguas)
del pueblu de Granailla.

Tamién se ve Sartaleju,
juntu al Cerru de la Mesa
andi trabaja´l obreru
día y nochi sin pereza.

!Vega de Vega la Barca,
tierra de las gamonitas,
andi trabaja el obreru
sin cogel cosa maldita!

Llegamus a Mudalpelu
y los Lotis de la Jesa;
¡si las güertas no resultan
nos va dolel la cabeza!