VISIÓN DE FUTURO
         
     
¡Carcabosu y Valdeobispu!
¡Ya se principió la Obra!
¡El añu cincuenta y nuevi
tenel´lu siempri en memoria!

Cuandu termini esti siglu,
quien lo vea conocel,
pa´nsomalsi a la Cuesta
y vel las aguas correl.

Los árbulis arrancaus;
ya no nos quean encinas,
ya no cogemus bellotas
pa engordal las cochinas.

Muchus árbulis frutalis
blanquean comu palomas;
las mujeris en la Cuesta
goliendu de sus aromas.

En cerro "La Ansomailla"
según tengu yo soñau
han de ponel una plaza,
una plaza de mercau.

Estación de camionis
que vengan del extranjeru
pa transportal la fruta;
traerán bastanti dineru.

Vieni la fruta templana
y la empiezan a cortal;
otrus preparan cajonis
pa la fruta embalal.

Una cuadrilla de mozus
hay cargandu camionis
pa transportal la fruta
y lleval´la a otras regionis.

Fruta pidin de "Malpelu"
la pidin de otras nacionis
y cuandu llegan los barcus
van jiciendu divisionis.

Ya se descargan los barcus
y empiezan a repartil
y tos gritan a vocis
¡a España voy a vivil!

Pol la fruta de "Malpelu"
que´n tierras americanas
el ancianu que la prueba
si está calvu cría pelus.